ஒருவள்!

கிச்சு கிச்சு கிளுகிளுப்பை
மூட்டி வந்தவள் - என்னைத்
தைச்சுப் போட்டு ஊசி மட்டும்
விட்டுச் சென்றவள்

பிறை நிலவாய் முழு நிலவாய்
சிரிப்பு பூத்தவள் - என்
பௌர்ணமியில் அமாவாசை
கரியைச் சேர்த்தவள்

வாலிபத்தை உலர வைத்துப்
பறந்து போனவள் - நல்ல
பாலதனைத் திரள வைத்து
மறந்து போனவள்

கெண்டை, கயல் விழி வரப்பில்
காட்டி நின்றவள் - ஒரு
மீனவனை வலைக்குள்ளே
மாட்டிச் சென்றவள்

பொதியாடும் மணிநெல்லை
உடைத்துப் போட்டவள் - வெறும்
தவிடாக்கி உமித் தூசி
உலர்த்திப் போனவள்

இருள் துலக்கும் மின்மினியை
எடுத்துக் கொண்டவள் - தன்
அகல் விளக்கில் ஈசலாக்கி
எரித்துக் கொன்றவள்