சேவல்!

குட்டையான அலகினோடும்
குருத்துப் போன்ற கொண்டையோடும்
பட்டுச் சொக்காய் இறகினோடும்
பரிதி வண்ணச் சிலிர்ப்பினோடும்
கட்டழகு வால் விசிறி
கருது போலக் காற்றிலாட
பெட்டகமாய் இரு சிறகைப்
பைக்குள்ளே வைத்துக்கொண்டு
நட்டமான கூரை மீது
நடனமாடிக் காட்டிவிட்டுப்
'பட்'டெனச் சிறகடித்துப்
பகட்டாகக் கழுத்தை நீட்டி
அட்டகாசமாகக் கூவி
அனைவரையும் எழுப்பி வைத்துப்
பெட்டைக் கோழி பின்னே சுற்றும்
பெருமை மிக்க சேவலைப் பார்!